Ekrani u rrinte bukur. Kishin prezencën, elokuencën dhe personalitetin që një imazh duhet të ketë përballë kamerës. Por sot, për arsye të ndryshme, i shohim shumë më rrallë në televizion. Pesë gra, pesë rrugë të ndryshme. Asnjëra nuk u zhduk vërtet; thjesht nuk i shohim më aty ku u mësuam t’i shihnim.
Disa zgjodhën familjen, disa biznesin e projektet personale, të tjera thjesht një jetë më larg prozhektorëve.
Fatma Methasani
Për publikun, Fatma Methasani lidhet menjëherë me “Fun Day”, programin rinor që ajo drejtoi për disa sezone në IN TV dhe që e ktheu në një nga fytyrat karakteristike të ekranit të asaj periudhe. Rrugëtimi i saj në televizion kishte nisur shumë herët, fillimisht në prapaskenë, ndërsa më pas kaloi përpara kamerës. Pas lindjes së djalit të saj, Noah, në vitin 2020, Fatma pati një periudhë shkëputjeje nga ekrani dhe më vonë mori edhe një rol drejtues në IN TV. Sot nuk e shohim më me të njëjtën frekuencë si moderatore përpara kamerave, por emri i saj mbetet i lidhur fort me një prej formateve rinore më jetëgjata të IN TV.
Jona Spahiu
Nga “Pa Filter” te “Kosherja”, Jona e ndërtoi emrin si moderatore me një stil të vetin, përpara se të largohej gradualisht nga ekrani. Sot është e angazhuar në biznesin e saj në fushën e eventeve dhe është aktive edhe në rrjetet sociale. Jona ka treguar se biznesi e mban të motivuar dhe se tashmë e sheh karrierën si një kombinim të disa fushave, jo vetëm televizionit.
null
Liberta Spahiu
E lidhur fort me “Prive”, Liberta Spahiu ka ndërtuar ndër vite një profil shumë të vetin dhe sot e ndan kohën mes angazhimeve profesionale, projekteve të tjera dhe jetës personale. Së fundmi moderatorja nga Kosova ka zgjedhur të mos shfaqet në ekran, por duke e kthyer emrin e saj në brand televiziv me “Prive”.
Xhesika Trola
E njohur sidomos nga ekranet sportive të SuperSport, Xhesika ishte një nga ato prezantuese që nuk kalonin pa u vënë re. Sot ka zgjedhur një jetë shumë më larg ritmit televiziv dhe është më e rezervuar me jetën e saj private. Një emër që rikthehet lehtë në kujtesë sa herë shfletojmë albumin e televizionit shqiptar.
Aida Bajraktari
Nga “Fiks Fare” te programet sportive, Aida pati një eksperiencë televizive të shkurtër, por të dallueshme. Më pas zgjodhi familjen dhe një jetë larg kamerave. Sot është shumë më private, ndërsa për publikun që e ka ndjekur atëherë, mbetet një nga portretet që sjellin menjëherë një buzëqeshje nostalgjike.
Fjoralba Ponari
“E Diell”, më pas “Ferma VIP” dhe një profil gjithnjë e më i konsoliduar në televizion. Fjoralba është më e reja në këtë listë dhe largimi i saj nga ekrani është edhe më i freskët. Megjithatë, ajo vazhdon të jetë shumë aktive publikisht dhe në rrjetet sociale, ndaj ekrani nuk është zhdukur krejtësisht nga jeta e saj.
