Screenshot
Ngjarja e rëndë ku humbi jetën 36-vjeçari Gerald Sefa ka tronditur jo vetëm familjarët, por edhe miqtë dhe personat që e njihnin. Pas lajmit për vdekjen e tij, në rrjetet sociale janë publikuar fotografi dhe video në kujtim të të riut, të shoqëruara me mesazhe lamtumire.
“Pushofsh i qetë, Geri jonë”, shkruhet në një prej postimeve të shpërndara në TikTok, krahas fotografisë së 36-vjeçarit.
Në një prej postimeve, një mik i tij shkruan: “Nuk e di çfarë çuni ke qenë, pse pikërisht ty, zemra e vëllait. Kurrë s’do t’i harroj gjërat që kemi kaluar bashkë. Pavarësisht se jeta i ndan njerëzit, ishalla shpirti në xhenet, zemra ime. Siç e ke pasur zemrën flori, ishalla ashtu e gjen edhe në botën tjetër”. Në një tjetër postim, krahas një fotografie të 36-vjeçarit pranë motorit, shkruhet: “Na pushojnë lotët o Ger”, duke dëshmuar dhimbjen e miqve për humbjen e tij.
Në një tjetër video, miqtë shihen të mbledhur me motorë në rrugët e Tiranës, në atë që paraqitet në postim si një përcjellje në kujtim të tij. “Allahu të mëshiroftë, vëllai jonë”, është mesazhi që shoqëron pamjet.
Gerald Sefa humbi jetën pasi u hodh nga kati i pestë i një pallati në zonën e Alliasit në Tiranë. Në lidhje me ngjarjen, policia ka arrestuar babain e ish-bashkëjetueses së tij, nën dyshimin për veprën penale të shkaktimit të vetëvrasjes. Sipas të dhënave të hetimit të raportuara deri tani, mes tyre dyshohet se kishte pasur një konflikt disa ditë përpara ngjarjes. Përgjegjësia penale dhe rrethanat e plota mbeten objekt i hetimit.
Ndërsa autoritetet vijojnë hetimet, miqtë e Gerald Sefës po e kujtojnë publikisht me fotografi, video dhe mesazhe lamtumire, duke shprehur dhimbjen për humbjen e 36-vjeçarit.
