Pas shumë vitesh të kaluara në arsim, mësuesi i Edukimit Fizik në shkollën 9-vjeçare “Besëlidhja e Malësisë”, Gëzim Pali, ka përmbyllur një nga kapitujt më të rëndësishëm të jetës së tij profesionale.
Dita e fundit në shkollë nuk kaloi si një ditë e zakonshme. Nxënësit dhe kolegët i kishin përgatitur një surprizë të veçantë, duke e përcjellë me emocione, falënderime dhe mirënjohje për punën e bërë ndër vite.
Për breza të tërë nxënësish, Gëzim Pali nuk ka qenë vetëm mësuesi që u ka mësuar sportin, por edhe një figurë që u ka përcjellë disiplinën, respektin, bashkëpunimin dhe këmbënguljen.
Momentet e surprizës u kthyen në një përshëndetje simbolike për një karrierë të gjatë në arsim, ndërsa pensionimi shënon fillimin e një kapitulli të ri për mësuesin, këtë herë larg detyrës së përditshme, por jo larg kujtimeve të atyre që e kanë pasur pjesë të viteve të shkollës.
