Gjykata e Apelit ka ndryshuar masën e sigurisë për këngëtarin Jozefin Marku, duke e lënë atë në “detyrim paraqitje”. Marku ishte arrestuar më 5 shtator në kuadër të hetimeve për ngjarjen ku dyshohet se, së bashku me persona të tjerë, ka dhunuar Eduard Kuçin.
Fillimisht, Prokuroria kishte kërkuar masën “arrest me burg”, ndërsa Gjykata e Tiranës vendosi më 9 shtator masën “arrest në shtëpi” për Markun. Tashmë masa ndaj tij është zbutur në “detyrim paraqitje”.
Ngjarja u bë publike pasi në rrjetet sociale qarkulluan pamje të filmuara pranë mbikalimit të Rinasit. Sipas Policisë, Marku dhe persona të tjerë dyshohet se ndaluan Eduard Kuçin dhe e dhunuan, me pretendimin se ky i fundit kishte fyer njërin prej tyre. Në kuadër të hetimit është verifikuar edhe përdorimi pa të drejtë i elementeve dhe simboleve të Policisë së Shtetit.
Policia njoftoi në momentin e ndalimit se Marku dyshohej për veprat penale “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja e padrejtë në jetën private”. Hetimet për çështjen vijojnë dhe akuzat mbeten në fazën e procedimit; Marku prezumohet i pafajshëm deri në një vendim të formës së prerë.
