Paraditen e 4 qershorit, 34-vjeçari Eglant Koçi u largua nga banesa e tij për të takuar mikun e tij, Armand Shakaj, në një ambient zyre në një pallat pranë bulevardit “Zhan D’Ark” në Tiranë. Sipas hetimeve, Koçi është filmuar nga kamerat e sigurisë duke hyrë në ndërtesë, por jo duke dalë prej saj.
null
Gjatë këqyrjes së zyrës, grupi hetimor ka gjetur gjurmë gjaku dhe materiale biologjike, prova që konsiderohen kyçe për zbardhjen e fatit të 34-vjeçarit. Në katin e dytë të pallatit ndodhen disa njësi tregtare të monitoruara me kamera sigurie, të cilat kanë dokumentuar hyrjen e Koçit, por jo largimin e tij.
Sipas dyshimeve të hetuesve, Armand Shakaj është përpjekur të fshijë gjurmët pas ngjarjes, duke ndërhyrë në sistemin e kamerave të sigurisë në korridoret e pallatit. Hetimet kanë zbuluar gjithashtu se pas çaktivizimit të kamerave të brendshme, ai dyshohet se ka urdhëruar kamerierin e lokalit të tij, Enea Zyferi, të ndërpriste energjinë elektrike, çka do të shmangte regjistrimin e lëvizjeve në zonë.
Prokuroria dyshon se gjatë kësaj kohe është bërë transportimi i trupit të 34-vjeçarit nga ambientet e zyrës drejt automjetit tip “Porsche” të përdorur nga i dyshuari, i cili ndodhej i parkuar jashtë ndërtesës.
Enea Zyferi është arrestuar si bashkëpunëtor në këtë ngjarje dhe Gjykata e Tiranës ka vendosur ndaj tij masën e sigurisë “arrest me burg” deri në përfundim të hetimeve. Në deklarimet e dhëna para gjykatës, ai ka pretenduar se nuk kishte dijeni për fatin e Eglant Koçit dhe se kishte zbatuar vetëm urdhrat e pronarit të tij, i cili, sipas tij, i kishte thënë se do të transportonte një frigorifer.
Pas disa ditësh hetimesh intensive, Policia e Tiranës arriti të lokalizojë automjetin e Armand Shakajt. Gjatë kontrollit në bagazhin e mjetit janë gjetur materiale biologjike, të cilat janë sekuestruar dhe dërguar për ekspertim.
Një tjetër provë me rëndësi për hetimin është edhe motori i Eglant Koçit. Sipas hetimeve paraprake, pas ngjarjes i dyshuari e ka lëvizur mjetin fillimisht në zonën e Tregut Elektrik dhe më pas në “5 Maji”, ku u gjet dhe u sekuestrua nga policia.
Tashmë gjurmët biologjike dhe provat e mbledhura në zyrë, automjet dhe motor janë dërguar në laboratorin shkencor. Rezultatet e ekspertimeve pritet të hedhin më shumë dritë mbi një nga ngjarjet më të rënda kriminale të javëve të fundit.
