Gazetarja e Citizien.al, Vjolanda Peca, është liruar nga ambientet e Komisariatit nr. 1, pasi u shoqërua dhe u mbajt për më shumë se dy orë, ndërsa raportonte protestën e zhvilluar para Kuvendit. Peca u shoqërua nga efektivët e Policisë së Shtetit teksa ishte në krye të detyrës, duke mbuluar zhvillimet e protestës, ndërsa deri më tani nuk janë bërë publike arsyet e shoqërimit të saj.
Ngjarja ka nxitur reagime të forta, duke u cilësuar si një shkelje e rëndë e lirisë së medias dhe e së drejtës së gazetarëve për të ushtruar profesionin.
Përmes një reagimi publik, Citizens.al bëri me dije lajmin për shoqërimin e gazetares, duke theksuar se ajo po ushtronte detyrën e saj në momentin kur u ndalua nga policia. Media dënoi veprimin e autoriteteve, duke e cilësuar si një cenim të ushtrimit të lirë të profesionit të gazetarit.
Reagimi i Citizens.al:
Gazetarja e Citizens.al, Vjolanda Peca është shoqëruar në Komisariatin nr.1, ku po mbahet në kushte të privimit të lirisë.
Ajo ishte ishte duke ushtruar detyrën e saj në raportimin e protestës së zhvilluar sot para Kuvendit.
Gazetarët kanë detyrimin dhe të drejtën kushtetuese të raportojnë ngjarjet me interes publik, pa u penguar, intimiduar apo shoqëruar nga autoritetet për shkak të punës së tyre. Çdo ndërhyrje që cenon ushtrimin e lirë të profesionit përbën shqetësim serioz për lirinë e medias dhe të drejtën e publikut për t’u informuar.
Redaksia jonë e dënon këtë akt dhe u bën thirrje autoriteteve të garantojnë që gazetarët të ushtrojnë detyrën e tyre në mënyrë të lirë, të sigurt dhe pa presion, ndërsa mbetemi të angazhuar në mbrojtje të lirisë së medias dhe të drejtës për informim.
Unioni i Gazetarëve Shqiptarë ka denoncuar sjelljen e Policisë së Shtetit gjatë protestës së ditës së djeshme, ku thekson se gazetarët dhe operatorët e mediave janë penguar në kryerjen e detyrës së tyre, duke u sulmuar me ujëhedhës e gaz lotsjellës, si dhe duke u shoqëruar në komisariat pa shpjegim publik.
Unioni i Gazetarëve Shqiptarë kërkon përgjegjësi nga autoritetet e Policisë dhe Ministria e Brendshme, duke njoftuar se do të përgatisë raporte për organizatat ndërkombëtare që monitorojnë liritë themelore.
Në reagim thuhet se nëse këto akte përsëriten, komuniteti i gazetarëve do të reagojë me protesta dhe solidaritet, duke e kthyer çështjen në një kauzë më të gjerë për mbrojtjen e lirisë së medias dhe të drejtave të njeriut.
Reagimi i plotë:
Deklaratë e Unionit të Gazetarëve Shqiptarë
Shoqërimet e gazetarëve në polici dhe sulmimi i tyre me mjetet ujëhedhëse dhe gazlotues është akt i dënueshëm
Tiranë më 23.07.2026
Unioni i Gazetarëve Shqiptarë denoncon dhunën dhe agresivitetin e Policisë së Shtetit të dëshmuar sot para mjedisit të Kuvendit të Shqipërisë, jo vetëm ndaj qytetarëve korrekt, por veçanërisht ndaj gazetarëve, punonjësve dhe mjeteve të identifikuara të mediave.
Në mënyrë të përsëritur Policia e Shtetit gjatë seancave parlamentare përsërit bllokimin e hyrjes së gazetarëve dhe operatorëve, duke shkelur rregulloren e institucionit të lartë kushtetues.
Gjatë episodeve të protestës së ditës së sotme, Policia e Shtetit sulmoi me automjetet ujëhedhës reporterët, operatorët dhe bëri të pamundur procesin normal të raportimit prej tyre, sidomos gjatë transmetimeve direkte.
Imazhet e publikuara nga mediat dhe rrjetet online, kur sulmohen me mjetet ujëhedhës dhe gaz lotsjellës, gazetarët në detyrë, përbëjnë një dëshmi të sjelljes së ashpër të Policisë ndaj gazetarëve në detyrë.
Shoqërimi i reporteres së organizatës mediatike Citizens.al, Vjolanda Peca në Komisariatin e Policisë dhe mbajtja e saj në kushtet e kufizimit të lirisë për më shumë se dy orë, pa një sqarim publik, përbën një shkelje dhe akt cënues dhe pengues të gazetarit.
Gazetarja u mor me forcë duke qenë në krye të detyrës.
Unioni i Gazetarëve Shqiptarë gjatë ditës së sotme, ka marrë disa ankesa nga kolegë dhe operatorë të mediave të cilët, jo vetëm janë sulmuar nga mjetet ujëhedhëse dhe gazi lotues, por janë përballur me shtyrje, pengime fizike për të qenë në pozicionet e përcaktuara me rregullore Kuvendi si dhe u janë dëmtuar paisjet profesionale.
UGSH i drejtohet autoritetit të Drejtorit të Përgjithshëm të Policisë së Shtetit dhe Ministrit të Brendshëm të vënë para përgjegjësisë të gjithë personat nën uniformë që guxojnë të përsërisin akte dhe sjellje të tilla ndaj gazetarëve.
Organizata jonë ju bën me dije këtyre autoriteteve se për të gjitha rastet po përgatitet një raport -dëshmues i cili do t’u vihet në dispozicion partnerëve, organizatave dhe institucioneve që monitorojnë liritë themelore dhe veçanërisht lirinë e medias në vendin tonë.
Mosreagimet dhe sidomos mungesa e sqarimeve publike prej Policisë së Shtetit për kësi rastesh dhe për shoqërimin e gazetares Peca, përbën një heshtje kompromentuese. Për këtë arsye paralajmërojmë titullarin e këtij institucioni, Drejtorin e Përgjithshëm, zotin Hita se në rast të ripërsëritjes së episodeve të tilla do të përballet me një reagim solidar proteste dhe jo vetëm, nga komuniteti ynë profesional dhe rrjete organizatash që kontribuojnë për lirinë e shprehjes dhe medias në vendin tonë e më gjerë.
Zyra Informues
Unioni i Gazetarëve Shqiptarë
P.S: Në foto, kolegia Vjolanda Peca e mbajtur në kufizim lirie për më shumë se dy orë në komisariat të Policisë së Shtetit, Tiranë ditën e sotme.
