Ferne King është turistja e huaj 25-vjeçare e cila, siç kemi raportuar dhe ne, mesditën e 8 tetori u gjet e pajetë në një dhomë me qira përgjatë Rrugës Taulantia në lagjen jugperëndimore të qytetit të Durrësit.
Mësohet se shtetasja skoceze, së bashku me vajzën e saj, kishte mbërritur në qytetin bregdetar dy ditë para se të ndërronte jetë.
Ishte një pastruese e cila shkoi të rregullonte dhomën pasi data e rezervimit kishte mbaruar dhe Ferne duhej të linte dhomën. Mirëpo, e reja u gjet e pajetë në shtrat, ndërsa pranë saj ndodhej vajza e vet 2 vjeçe.
Dyshimet e para të vdekjes së të resë janë se 25-vjeçarja ka ndërruar jetë pas në arresti kardiak, për shkak se pranë saj u gjetën një sërë medikamentesh, të cilët dyshohet t’i ketë pirë duke i dhënë fund jetës së saj. Megjithatë një ekspertizë mjeko-ligjore është në proces.
Për rastin e rëndë që tronditi Durrësin, mesditën e tetë tetorit, kanë shkruar dhe mediat e huaja, të cilat bëjnë me dije se ceremonia mortore e saj do të zhvillohet, një muaj pas vdekjes së saj, në krematoriumin e Kirkcaldy-t të premten, më 6 nëntor, në orën 10:15.
Artikulli i plotë i medias së huaj:
Janë bërë homazhe për një nënë të re nga Cardenden në Skoci, të cilën e kanë kujtuar si një person “të dashur dhe të shtrenjtë për zemrat e të gjithëve”, e cila ndërroi jetë gjatë pushimeve në Shqipëri, ku kishte udhëtuar me vajzën e saj dyvjeçare.
Ferne King, 25 vjeçe, ndërroi jetë në fillim të këtij muaji, pasi kishte udhëtuar për një qëndrim të shkurtër në qytetin bregdetar të Durrësit.
Familjarët e saj e kanë kujtuar si një nënë, bijë, motër dhe shoqe shumë të dashur, përpara funeralit të saj javën e ardhshme.
Pas vdekjes së saj, u hap një fushatë për mbledhjen e fondeve me emrin “Bring an angel home” (“Silleni një engjëll në shtëpi”), për të ndihmuar me shpenzimet e kthimit të trupit të saj në Mbretërinë e Bashkuar.
Fushata ka mbledhur më shumë se 3.800 paund, ndërsa organizatorja Jade Ëilson tha se motra e Ferne-s, Saffron, ishte përpjekur ta kthente në shtëpi, por i ishte kërkuar të paguante 10.000 paund.
Në thirrjen për donacione thuhej: “Kjo është një dhimbje dhe stres i jashtëzakonshëm për familjen dhe miqtë që janë prekur nga kjo ngjarje. Ferne duhet të jetë në shtëpi!”
Më tej thuhej: “Zoti ka fituar një engjëll, por shpirti i saj i bukur duhet të kthehet në shtëpi.
Ajo kishte udhëtuar në Durrës me vajzën e saj dyvjeçare dhe po qëndronte në një banesë me qira kur ndërroi jetë.
Raportime të pakonfirmuara nga mediat lokale shqiptare bëjnë të ditur se Ferne mund të ketë ndërruar jetë si pasojë e një problemi akut kardiak.
Vajza e saj raportohet se ishte në gjendje të mirë shëndetësore dhe u vu nën kujdesin e shërbimeve sociale.
Që atëherë, familjarët e Ferne-s kanë bërë homazhe për nënën e dashur, përpara funeralit të saj.
Në njoftimin mortor thuhej: “Nëna e dashur dhe e shtrenjtë e Sihana-s, bija e dashur e Heather-it dhe të ndjerit Alan, motra plot jetë e Saffron-it, Alistair-it dhe Oscar-it, mbesa e dashur e Jo-s, teze dhe një shoqe shumë e mirë për shumë të tjerë.
“Do të na mungosh shumë, Ferne.”
Funerali i saj do të mbahet në krematoriumin e Kirkcaldy-t të premten, më 6 nëntor, në orën 10:15, ku të afërmit dhe miqtë janë të ftuar të marrin pjesë.
Familja ka kërkuar që të mos dërgohen buqeta me lule, ndërsa donacionet mund të bëhen në ndihmë të shtëpisë së kujdesit për të moshuarit Lomond Court në Glenrothes.
