Një studim i ri ndërkombëtar ka ngritur alarmin për rritjen e infertilitetit te gratë, duke treguar se aktualisht rreth 53.6 milionë gra të moshës 35–49 vjeç nuk arrijnë të mbeten shtatzënë.
Hulumtimi, i kryer nga studiues të Universitetit Mjekësor të Chongqing, analizoi të dhëna nga 204 vende për periudhën 1990–2023. Rezultatet tregojnë se barra globale e infertilitetit është rritur vazhdimisht gjatë tre dekadave të fundit dhe pritet të vazhdojë të rritet edhe në vitet e ardhshme.
Sipas studimit të publikuar në revistën The Lancet Obstetrics, Gynaecology, & Women’s Health, rritja më e shpejtë parashikohet te gratë e moshës 35–39 vjeç. Kjo nuk do të thotë se ato janë më infertile se gratë më të mëdha në moshë, por se numri i rasteve në këtë grup po shtohet më shpejt.
Ekspertët e lidhin këtë fenomen me shtyrjen e amësisë për shkak të studimeve, karrierës dhe faktorëve ekonomikë. Në kohën kur shumë gra vendosin të krijojnë familje, fertiliteti mund të ketë filluar tashmë të bjerë në mënyrë natyrale.
Autorët theksojnë se edhe obeziteti, stresi dhe ndryshimet në stilin e jetesës mund të ndikojnë negativisht në fertilitet. Ndërkohë, përmirësimi i aksesit në trajtimet e fertilitetit ka bërë që të diagnostikohen më shumë raste.
Parashikimet tregojnë se deri në vitin 2036, numri i grave të prekura nga infertiliteti mund të arrijë në 79.6 milionë në nivel global.
Studiuesit nënvizojnë se infertiliteti nuk është vetëm një problem mjekësor, por edhe një sfidë psikologjike, sociale dhe ekonomike. Për këtë arsye, ata bëjnë thirrje që kujdesi për fertilitetin të trajtohet si një prioritet i shëndetit publik, me diagnostikim të hershëm, akses më të mirë në trajtime dhe politika që mbështesin planifikimin familjar.
