Moderatori dhe gazetari i njohur shqiptar Bledi Strakosha ka folur për një periudhë të vështirë shëndetësore, gjatë së cilës iu nënshtrua një ndërhyrjeje kirurgjikale delikate në Spitalin Amerikan 3 në Tiranë.
Pas 12 ditësh nën kujdesin e mjekëve, Strakosha ka lënë spitalin dhe ka zgjedhur të ndajë publikisht një mesazh mirënjohjeje për familjen, miqtë dhe të gjithë ata që e mbështetën gjatë kësaj periudhe.
“Ka periudha në jetë që të bëjnë të ndalosh, të reflektosh dhe të kuptosh edhe më shumë se sa e çmuar është jeta dhe njerëzit që ke pranë. Sot, me shumë mirënjohje, dua t’ju falënderoj të gjithëve për çdo mesazh, telefonatë, fjalë të mirë, lutje dhe mendim pozitiv që më keni dhuruar gjatë kësaj periudhe jo të lehtë shëndetësore për shkak të një ndërhyrjeje delikate dhe të vështirë”, ka shkruar ai.
Moderatori ka falënderuar në mënyrë të veçantë edhe ekipin mjekësor që u kujdes për të, duke bërë të ditur se ndërhyrja kishte përfunduar me sukses.
“Fatmirësisht, gjithçka shkoi shumë mirë falë ekipit të Spitalit Amerikan 3 të drejtuar nga Profesor Eugen Enesi. Faleminderit edhe doktoreshë Vojsava Leka dhe Stela Dodaj që më ndoqën për 12 ditë me një përkushtim të rrallë. Faleminderit që ishit pranë meje, veçanërisht familjes sime. Mirënjohje nga zemra!”, ka shkruar Strakosha.
Bledi Strakosha nuk ka bërë publik shkakun konkret të problemit shëndetësor dhe as natyrën e ndërhyrjes. Në media është raportuar se mund të ketë pësuar një goditje në tru, por ky informacion nuk është konfirmuar nga vetë moderatori, ndaj mbetet një pretendim i pakonfirmuar.
Pas ditëve të vështira në spital, mesazhi i tij tregon se faza më delikate tashmë është kaluar dhe se ai është larguar nga spitali me mirënjohje për të gjithë ata që i qëndruan pranë.
