Dita e dasmës nuk ka shkuar tamam sipas planit për një 30-vjeçar, i cili është proceduar penalisht pasi dyshohet se qëlloi disa herë në ajër me pistoletë ndërsa po shkonte të merrte nusen.
Ngjarja ka ndodhur në Kamëz teksa i riu me inicialet F. K. ishte nisur drejt Institutit për të marrë nusen dhe për të vijuar ceremoninë e martesës.
Në atmosferën e festës, 30-vjeçari dyshohet se ka nxjerrë një pistoletë dhe ka qëlluar disa herë në ajër. Arma dyshohet se është manovër, por kjo pritet të përcaktohet përfundimisht nga ekspertiza.
Të shtënat kanë sjellë ndërhyrjen e policisë. Specialistët për Hetimin e Krimit në Komisariatin e Policisë Nr. 5 kanë proceduar penalisht dhëndrin, ndërsa pistoleta është sekuestruar në cilësinë e provës materiale.
Ndaj 30-vjeçarit kanë nisur hetimet për veprat që lidhen me armëmbajtjen pa leje dhe prishjen e qetësisë publike.
Ekspertiza pritet tashmë të përcaktojë nëse pistoleta e përdorur ishte armë manovër apo armë zjarri.
Kështu, një ditë që duhej të mbahej mend vetëm për dasmën, për dhëndrin përfundoi edhe me një procedim penal.
