Është zbardhur plagosja e 26-vjeçari në zonën e freskut në Tiranë. Policia bën me dije se ka shpallur në kërkim Gjoke Ndrevataj dhe Xhemal Uka, pasi dyshohet se kanë porositur plagosjen e të riut.
Ndërsa bëhet me dije se policia ka arrestuar 49-vjeçarin, i cili është autor i plagosjes.
Po ashtu është proceduar penalisht, pasi dyshohet se ka shoqëruar 49-vjeçarin për të kryer krimin, si dhe ka refuzuar të deklarojë në polici.
Personazhi i rrjeteve sociale, Gjoke Ndrevataj, i njohur në TikTok me pseudonimin Aroni ka publikuar në transmetim live pamje nga momenti i sulmit ndaj një 26-vjeçari më 6 dhjetor, pranë rrethrrotullimit të Freskut.
Sipas policisë, Ndrevataj është shpallur në kërkim së bashku me një tjetër personazh të TikTok, Xhemal Uka, i njohur si Fire. Të dy dyshohen si porositës të sulmit ndaj të riut, i cili u mor persiper nga Helidon Marku. Ky i fundit është arrestuar, ndërsa hetimet vijojnë.
Paraprakisht mësohet se konflikti ka nisur nga komentet që 26-vjeçari kishte bërë gjatë transmetimeve live të personazheve në fjalë.
Njoftimi i policisë:
Tiranë/Zbardhet dinamika e ngjarjes së ndodhur më datë 06.12.2025, te rrethrrotullimi i zonës së Freskut, ku u plagos rëndë, me sende të forta, një 26-vjeçar.
Identifikohen 3 shtetas të përfshirë në këtë rast, konkretisht 2 porositësit e plagosjes dhe njëri nga autorët.
Vihet në pranga ky i fundit dhe punohet intensivisht për kapjen e 2 porositësve.
Të tre shtetasit e përfshirë, me precedentë penal të theksuar për krime kundër personit.
I arrestuari, me precedent edhe për armëmbajtje pa leje.
Procedohet penalisht një shtetas që dyshohet se ka shoqëruar autorin e plagosjes, te vendi i kryerjes së krimit, dhe nuk ka kallëzuar rrethana të rastit.
Si rezultat i veprimeve hetimore të kryera me qëllim zbardhjen e autorësisë dhe rrethanave të plagosjes së rëndë të shtetasit F. Y., me sende të forta, më datë 06.12.2025, te rrethrrotullimi i zonës së Freskut, shërbimet e Komisariatit të Policisë Nr. 4, në kuadër të operacionit “Porosia”, identifikuan 3 shtetas të përfshirë në këtë rast, konkretisht H. M., 49 vjeç, Gj. N., 36 vjeç dhe Xh. U., 30 vjeç.
Nga këto veprime rezultoi se 36-vjeçari dhe 30-vjeçari, për motive të dobëta, kanë porositur shtetasin H. M., për të kryer plagosjen.
Në vijim të veprimeve operacionale, 49-vjeçari u kap dhe u vu në pranga, ndërkaq po punohet për kapjen e shtetasve Gj. N. dhe Xh. U., si dhe për identifikimin dhe kapjen e shtetasve të tjerë që dyshohet se janë përfshirë në plagosjen e 26-vjeçarit.
Gjithashtu, nisi procedimi në gjendje të lirë për shtetasin T. D., 33 vjeç, pasi dyshohet se ka shoqëruar shtetasin H. M., për të kryer krimin, si dhe ka refuzuar të deklarojë në polici, rrethana të kësaj ngjarjeje, për të cilat dyshohet se ka patur dijeni.
Materialet procedurale iu referuan Prokurorisë së Tiranës, për veprime të mëtejshme.
