Një ngjarje e rëndë ka tronditur komunitetin shqiptar në Itali. Shpresa Mrishaj, 54 vjeç, u gjet e pajetë brenda një tubi kanali në zonën e Gignod, vetëm pak metra larg banesës ku po qëndronte.
Gruaja kishte mbërritur në Itali për të marrë pjesë në ditëlindjen e nipit të saj, por pasditen e së mërkurës, rreth orës 16:30, ajo doli nga shtëpia pa telefon, pa portofol dhe pa asnjë send personal. Që nga ai moment, nuk u pa më gjallë.
Familja u alarmua menjëherë, pasi Shpresa nuk e njihte mirë zonën dhe kishte vështirësi në ecje. Policia italiane nisi kërkimet intensive, të cilat zgjatën gjatë gjithë natës dhe mëngjesit të së enjtes, por pa rezultat.
Pas disa orësh kërkimesh, tragjedia u konfirmua. Trupi i gruas u gjet i bllokuar në një tub të ngushtë uji, pasi rrjedha e kishte rrëshqitur disa metra brenda. Për ta nxjerrë, zjarrfikësit përdorën një ekskavator, ndërsa policia mjeko-ligjore dhe prokurori Manlio D’Ambrosi mbërritën menjëherë në vendngjarje.
Hetimet po vazhdojnë për të zbuluar rrethanat e ngjarjes, ndërsa hipoteza kryesore mbetet ajo e një veprimi të qëllimshëm. Pamjet e kamerave të sigurisë nga një banesë aty pranë janë marrë në shqyrtim, ndërsa të afërmit e gruas janë marrë në pyetje.
Vetëm pak hapa larg vendit ku u gjet trupi, familjarët e saj qëndronin të tronditur, të paaftë të besonin se vizita për një festë familjare do të kthehej në një tragjedi që tronditi gjithë komunitetin.
