Mot me reshje të dendura pritet gjatë ditëve në vijim, kryesisht në veri të vendit.
Bazuar në informacionin e dërguar nga Qendra e Koordinimit të Emergjencave Civile në Bruksel, Instituti i Gjeoshkencave dhe Shërbimi Meteorologjik Ushtarak, të premten, më 22 nëntor, priten reshje “intensive” deri “shumë intensive” në qarqet Shkodër, Kukës, Dibër, Tiranë dhe Elbasan.
Në qarqet e tjera priten reshje mesatare, të cilat lokalisht mund të arrijnë deri në nivelin “intensive”.
Agjencia Kombëtare e Mbrojtjes Civile ka kërkuar rritjen e gatishmërisë së strukturave të sistemit të Mbrojtjes Civile, si dhe të institucioneve që administrojnë hidrovoret, rezervuarët, infrastrukturën rrugore, furnizimin me energji elektrike, furnizimin me ujë, monitorimin e nivelit të lumenjve dhe çdo strukturë tjetër në funksion të menaxhimit të emergjencave civile.
AKMC u bën thirrje prefekturave dhe bashkive të mobilizojnë strukturat për menaxhimin e emergjencave civile dhe të monitorojnë situatën në zonat me rrezik më të lartë.
Mbrëmjen e sotme është raportuar për rrebeshe shiu dhe stuhi, të cilat jo vetëm krijuan problematika qarkullimi për shkak të rënies së inerteve, por edhe këputje të kabujve të tensionit të mesëm nga shtyllat elektrike, disa prej të cilëve kanë rrënë edhe në rrugë.
OSHEE ka dërguar njësi elektricistësh që po punojnë, teksa shumë zona janë pa energji elektrike dhe ka takim-stakime. Këshillohen banorë dhe udhëtarë që të jenë të kujdesshëm gjatë udhëtimit përgjatë aksit Pukë-Fushë-Arrëz.
