Një deklaratë e papritur nga ish-banori i “Big Brother VIP Albania”, Ardit Çuni, ka rikthyer vëmendjen tek një nga elementët më të diskutuar të formatit: bileta e kthimit. Pas zhurmës që bëri së fundmi rasti i Artan Kolës, duket se një histori e ngjashme ka ndodhur shumë më herët, por kishte mbetur e pazbuluar deri tani.
Në një video të publikuar në TikTok, Arditi ka rrëfyer se gjatë qëndrimit të tij në shtëpinë e BBVA në edicionin e parë, kishte arritur të hapte biletën e tij pa u vënë re nga produksioni apo banorët e tjerë. Sipas tij, ky veprim ishte bërë në mënyrë të fshehtë dhe shumë të kujdesshme.
“Biletën e ka hapur kush e ka hapur në kohë të vet dhe askush s’e mori vesh,” u shpreh ai, duke lënë të kuptohet se ky fenomen mund të mos ketë qenë rast i izoluar.
Por ajo që ka bërë më shumë bujë është fakti që Arditi e dinte paraprakisht se kishte në dorë një biletë kthimi, një avantazh shumë i madh brenda lojës. “E dija që kisha biletën e kthimit dhe mezi prisja ta përdorja,” shtoi ai në rrëfimin e tij.
Në një video tjetër, ai vendosi të zbulojë edhe “trukun” që përdori për ta hapur biletën pa u diktuar. Sipas tij, gjithçka ishte bërë me ndihmën e një peshqiri, duke e hapur në mënyrë të tillë që të mos linte gjurmë dhe të dukej sikur nuk ishte prekur fare.
Ky rrëfim ka ngritur shumë pikëpyetje mbi mënyrën se si janë menaxhuar elementë të tillë brenda formatit dhe sa të sigurta janë në të vërtetë këto “sekrete” për banorët.
