Vera Kravtsova, 26-vjeçe, ra pre e një mashtrimi që e çoi nga ëndrra e modës në një makth fatal në Mianmar, ku një rrjet kriminal dyshohet se i mori organet për t’i shitur.
Një ngjarje e tmerrshme ka tronditur botën e modës dhe publikun ndërkombëtar. Vera Kravtsova, një vajzë 26-vjeçare nga Bjellorusia, humbi jetën pas një mashtrimi që filloi si një ofertë e rreme pune si modele në Bangkok, Tajlandë, por përfundoi në Mianmar, ku dyshohet se organet e saj u trafikuan në tregun e zi.
Sipas raportimeve të The Sun dhe Mash, Vera u tërhoq nga premtimi për një karrierë në industrinë e modës dhe udhëtoi drejt Tajlandës me ëndrrën për të bërë sukses në pasarelat ndërkombëtare. Megjithatë, sapo mbërriti, ajo u rrëmbye dhe u transportua ilegalisht përtej kufirit në Mianmar.
Viktima u mbajt e mbyllur në një qendër mashtrimi, e drejtuar nga një rrjet kriminal që përfshinte banda kineze dhe milici lokale burmeze. Burime pranë hetimeve raportojnë se ajo ishte e detyruar të dukej tërheqëse dhe të mashtronte klientë të pasur për t’u marrë para, duke e kthyer situatën në një skemë të rrezikshme dhe kriminale.
Ngjarja ngre alarmin për trafikun e qenieve njerëzore dhe tregtinë e paligjshme të organeve, duke treguar rrezikun real që mund të përballen të rinjtë që kërkojnë mundësi pune jashtë vendit.
