Blerja e një shtëpie konsiderohet një nga shpenzimet më të mëdha, sidomos në Kinë, ku çmimet e pronave vazhdojnë të rriten. Por një histori e fundit nga qyteti i Shenzhen ka bërë bujë të madhe në rrjetet sociale kineze.
Një blog post i publikuar në platformën Tian Ya Yi Du nga një përdorues me pseudonimin ‘Proud Qiaoba’ rrëfen historinë e Xiaoli-t (emër i ndryshuar), një gruaje që përdori një metodë të pazakontë për të mbledhur para për një depozitë shtëpie.
Xiaoli i kërkoi secilit nga 20 të dashurit e saj të blinin iPhone 7 të sapolançuar, të cilët më pas i shiti në një kompani riciklimi telefonash, Hui Shou Bao, duke fituar 120,000 yuan kinezë (rreth 14,500 £). Me këto para ajo bleu depozitën për shtëpinë e saj në periferi.
Blogu tregon se miqtë e Xiaoli-t mbetën të habitur kur ajo zbuloi metodën e saj të zgjuar. “Tani të gjithë në zyrë flasin për këtë,” shkruan Proud Qiaoba, duke shtuar se Xiaoli nuk vjen nga një familje e pasur: nëna është shtëpiake dhe babai punon si emigrant, dhe ajo është vajza më e madhe.
Historia ka nxitur debate në Sina Weibo, ku hashtag-u që përkthehet “20 telefona për një shtëpi” u bë trend i parë dhe është përdorur mbi 13 milionë herë. Shumë përdorues e lavdërojnë Xiaoli për shpirtin e saj sipërmarrës, ndërsa të tjerë e kritikojnë si “shumë pa turp”.
Kompania Hui Shou Bao konfirmoi për BBC se kishte blerë vërtet 20 iPhone nga një klientë femër në fillim të tetorit, duke paguar 6,000 yuan për secilin. Megjithatë, Xiaoli refuzoi intervistën, duke thënë se dëshironte të shmangte mediat. /BBC
