Pas deklaratave të bujshme të Luanës Myrto në emisionin “Review” të Euronews Albania, ku akuzoi përfaqësues të komunitetit LGBT për mashtrime dhe keqpërdorim, ka ardhur reagimi zyrtar i qendrës “Streha”, që ka qenë në qendër të akuzave.
Në një sqarim publik, “Streha” thekson se Luana nuk është “marrë” nga familja dhe futur në qendër, siç ajo pretendon, por është vendosur me vendim të institucioneve shtetërore për mbrojtje emergjente, pasi në atë kohë ishte vetëm 16 vjeç dhe në situatë të lartë rreziku.
“Vendosja e saj në shërbim ka qenë rezultat i një vendimi të institucioneve shtetërore për mbrojtje emergjente, në koordinim me Shërbimin Social Shtetëror Durrës dhe më pas me Qendrën e Specializuar ‘ARSIS’. Nëna e saj kishte hequr dorë nga kujdestaria ligjore përpara noterit publik,” – thuhet në deklaratë.
Shoqata shton se strehimi i saj ishte i përkohshëm dhe përjashtimor, pasi qendra “Streha” punon me persona mbi 18 vjeç, dhe më pas ajo është transferuar në qendrën “Tjetër Vizion” në Elbasan për vazhdimin e shkollimit.
“Pas përfundimit të studimeve dhe pas moshës madhore, Luana është paraqitur disa herë me vullnet të plotë për mbështetje, dhe çdo herë është trajtuar sipas protokolleve profesionale,” – thekson më tej qendra.
Në përfundim, “Streha” deklaron se çdo veprim është i dokumentuar dhe i ligjshëm, duke ftuar Prokurorinë të nisë hetimet për të verifikuar faktet dhe për të garantuar transparencën.
“Çdo veprim i yni është i dokumentuar detajisht. Ftojmë Prokurorinë dhe organet e ndjekjes penale të nisin menjëherë hetimet e nevojshme,” – thuhet në reagim.
Pas publikimit të deklaratës së “Strehës”, Luana Myrto reagoi me tone edhe më të ashpra në rrjete sociale.
Ajo i cilësoi sqarimet e qendrës si “përpjekje për ta diskredituar” dhe akuzoi drejtues të saj për trafik droge dhe korrupsion.
“Mos më bëni të flas se sa veta keni në burg nga qendra Streha për trafik droge… Nga një qendër sociale jeni kthyer në qendër trafiku. Bujrum në gjykatë të verifikojmë llogaritë dhe transfertat bankare,” – shkruan ajo.
Në reagimin e saj ironik, Myrto përmend edhe “makiazhet diplomatike dhe fondet e ambasadave”, duke lënë të kuptohet se pas debatit qëndrojnë edhe interesa financiare dhe politike.
“Makiazhi ambasadoro-vilisitik nuk ju mbulon rrudhat e shpirtit aq sa ju sponsorizon silikonin e buzëve. Unë nuk kam frikë nga askush, e vërteta do dalë në gjykatë,” – përfundon Myrto.
